Istorgia da l'ACEB

L'Archiv cultural d'Engiadina Bassa es gnü fondà als 8 avrigl 2010 aint illas localitats dal Chastè da Tarasp. Quai es stat ün act tuottafat special.

Il tema per fundar ün Archiv cultural in Engiadina Bassa es gnü discus diversas voutas aint il gremi da la Pro Engiadina Bassa. Il problem d'eira quel da chattar ün local adattà per archivar la documainta. La suprastanza da la PEB sco eir il secretariat d'eiran consciaints da quist bsögn. Fingià dürant ils ons 80 s'haja provà da chattar ün lö adattà, ma sainza success. Plü lönch chi's spettaiva e daplü documainta chi gniva büttada - da quel fat as d'eira consciaint. Davo cha singuls abitants pisserus da nossa regiun han gnü scrit a la suprastanza da la PEB da vulair tscherchar üna soluziun,  s'esa i manüdamaing in tschercha da soluziuns. L'ideja d'eira quella, ch'ün archiv stopcha as rechattar aint il cumün dal centrum. In quist cas Scuol. La cumbinaziun archiv e museum füss ideala. Causa cha'l Museum d'Engiadina Bassa nu pudaiva sprodscher man cun localitats, s'esa gnü a la conclusiun da dumandar al cumün da vaschins da Scuol per far adöver dal tablà da la chasa da povers. Quella as rechatta be dasper il museum. I s'ha dat l'incumbenza ad ün architect da vulair far üna proposta chi pussibiltess la colliaziun cul Museum d'Engiadina Bassa. Cur cha la suprastanza da la PEB ha gnü cugnuschentscha dals cuosts - i's trattaiva da raduond fr. 900'000.-- - ha'la decis da na realisar quista proposta. Darcheu s'haja dumandà als cumüns da la regiun schi nu pudessan metter a disposiziun localitats adattadas. Sar Rolf Zollinger da Vulpera ha miss a disposiziun provisoricamaing localitats illa Chasa Erica a Vulpera. Fit nu gniva inchargià, alch cuosts annuals per s-chodamaint s'haja fixà illa cunvegna tanter la PEB e'l fittader. Il secretari da la PEB ha survgni ün pensum per as dedichar a l'archivaziun da documainta. Cumanzà s'haja cun archivar documainta da l'Hotel Waldhaus, chi d'eira gnüda salvada davo l'incendi dals 27 mai 1989. Davo lungas retscherchas per chattar üna soluziun a lunga vista, ha proponü il cumün da Tschlin la chasa da scoula veglia chi as rechatta a S-chadatsch. Las localitats illas stanzas da scoula d'eiran adattadas per quist scopo, uschè cha la PEB ha decis da vulair surtour quista chasa cha'l cumün ha miss a disposiziun gratuitamaing. Ils cuosts d'infrastructura giaivan eir quia a charg dal fittadin. Uschè es gnüda fundada, sün giavüsch da la suprastanza da la PEB üna società independenta da l'organisaziun regiunala. La PEB ha però garanti ün sustegn finanzial. Il secretari Peder Rauch ha pardert ils statüts ed invidà a la radunanza da fundaziun chi ha gnü lö als 8 avrigl 2010 i'l Chastè da Tarasp. Il fundatur nun ha vuglü tour part illa suprastanza da la società. El ha chattà illa persuna da Domenic Scharplatz - quella vouta eir president dal Museum Stamparia Strada - il prüm president da l'Archiv cultural d'Engiadina Bassa.